अन्तर्राष्ट्रिय नेपाली कलाकार समाज इनासले आयोजना गरेको विश्वव्यापि अनलाईन गायन तथा नृत्य प्रतियोगिता २०२० को उपाधि पूर्ण लामा र डेन्मार्कका राजेश लामाले जितेका छन्। इनासले पहिलोपटक विश्वस्तरमा आयोजना गरेको यस प्रतियोगितामा नृत्य तर्फ नेपालका पूर्ण लामा र गायन तर्फ डेन्मार्कका राजेश लामाले उपाधि जितेका हुन्। प्रतियोगितामा उपाधि सहित दुवै कलाकारहरुले एक बर्षका लागि इनासको अवैतनिक ग्लोबल सदभावना राजदूतको उपाधि समेत प्राप्त गरेका छन्।
हरेक वर्ष महादेशस्तरमा नृत्य र गायन प्रतियोगिता आयोजना गर्दै आएको इनासले पहिलोपटक आयोजना गरेको यस प्रतियोगितामा विश्वभरिका धेरै नेपाली कलाकारहरुले भाग लिएका थिए। महादेश र ग्लोबल चरण रहने गरि अडिशन, क्वाटरफ़ाइनल सेमिफाइनल र फाइनल समेत चार चरणमा आयोजना गरिएको यस प्रतियोगितामा नृत्य तर्फ नेपालका शेखर घर्ति मगर दोश्रो र नेपालकै रबिता मगरले तेश्रो स्थान हासिल गरिन भने गायन तर्फ नेपालका शान्ति राई र चेक गणराज्यका डा. विजय गुरुङले क्रमश: दोश्रो र तेश्रो हुदै फस्ट रनर अप र सेकेण्ड रनर अपको उपाधी हात पारे।
नृत्य र गायन प्रतियोगिताको दुवै विधामा अडिशनको लागि बिभिन्न महादेशबाट करिब १७ सयको हाराहारीमा कलाकारहरुको भिडियोहरु आएको र त्यसमध्ये ४९२ कलाकारहरु मात्र अडिशनमा सहभागी हुन सफल भएका थिए भने २९८ जना क्वाटरफ़ाइनलमा प्रवेश गरेका थिए। क्वाटरफ़ाइनमा रहेका प्रतियोगीहरु मध्ये पब्लिक भोटिंग र निर्णायकहरुको अंकको आधारमा ५० जना सेमी-फाइनल र १० जना फ़ाइनल चरणमा प्रवेश गरेका थिए।
यस प्रतियोगितामा बिजेता तथा उपबिजेताहरुले नगद, ट्रफी र प्रमाण पत्र प्राप्त गर्नेछन भने इनासले आयोजना गर्ने कार्यक्रमहरुमा सहभागी हुने अवसर समेत पाउने छन्।
