फ्रान्समा यहि १२ अप्रिल बाट ५५ उमेर बर्षमाथिका सम्पूर्ण नागरिकलाइ खोप दिन थालिने भएको छ। फ्रान्सका स्वास्थ्य मन्त्री ओलिभिए भेरंले ५५ उमेर माथिका लाई अस्ट्राजेनीका र जोन्सोन एण्ड जोन्सोन र ६० बर्ष उमेर माथिकालाइ फाइजर बायोटेक र मोडेर्ना खोप दिने निर्णय भएको बताए।
फ्रान्समा हालसम्म १ करोड भन्दा बढी नागरिकलाइ खोप दिई सकिएको छ, जुन कुल जनसख्याको १६ प्रतिशत हुन आउछ। हाल सम्म ७५ बर्ष माथिका ६५ प्रतिशत र ६० देखि ७५ बर्ष सम्मका ४० प्रतिशत भन्दा बढीले खोप लगाई सकेका छन। प्रतिशतको आधारमा नागरिकलाइ खोप दिने देशहरुमा फ्रान्स १० औं स्थानमा रहेको छ ।
फ्रान्समा कोभिडको कारण मृत्यु हुनेको संख्या १ लाखको हाराहारीमा पुगेको छ। यस भाइरसको कारण दैनिक करिब ३४० जनाको ज्यान जाने गरेको छ भने करिब ६ हजारको सघन उपचार कक्षमा उपचार भैरहेको छ। फ्रान्समा अप्रिल पहिलो साताबाट सुरु भएको तेस्रो लकडाउन अझै जारी छ।
