लक्ष्मण गगन, अन्तरास्ट्रिय कलाकार समाज (इनास) फ्रान्सको आयोजनामा २० अक्टोबर, आइतबारका दिन फ्रान्सको पेरिसमा ‘दसैं-तिहार धमाका’ नामक बृहत सांस्कृतिक कार्यक्रम भब्य रूपमा सम्पन्न भएको छ।
रास्ट्रिय गानबाट बिधिबत रुपमा सुरु गरिएको उक्त कार्यक्रममा नर्बेबाट आएका अतिथि गायक बिष्णु क्षेत्रिले राष्ट्रिय भावनाले ओतप्रोत ‘जय नेपाल ‘ शिर्षकको गीत प्रस्तुत गर्दै सबैलाई मन्त्र मुग्ध बनाएका थिए । उनको यो आफ्नै गीतको म्युजिक भिडियो फ्रान्सको आभाष आचार्य प्रोडक्सनले गर्ने घोषणा गर्दै दोस्रो चरणमा अरु केहि गीत गाउदा दर्शकहरु नाच्न बाध्य भएका थिए । अर्का अतिथि गायक बेल्जियमका इनास स्टार लाहुरे कान्छाले समेत कार्यक्रममा सबैलाइ प्रभावित बनाउन सफल भएका थिए भने नित्य राइ, दृश्य नेपालले ट्रयाकमा आ-आफ्ना प्रस्तुति दिएका थिए । पेरिसमै बसोबास गर्ने ५० जना भन्दा बढी कलाकारहरुको आकर्षक एकल तथा सामुहिक नृत्यले माहौल निकै तताएको थियो ।
संस्थाका महासचिब महेन्द्र अधिकारी, सचिब भुवन आले र सोफिया बस्नेत आचार्य द्वारा उदघोषण गरिएको उक्त कार्यक्रमको प्रमुख आकर्षण लाइभ लोक दोहोरीको साथै पप कन्सर्ट रहेको थियो ।
पेरिसका केहि कलाकारको समूह ‘नेपाली ज्यम्स सेसन’को पप कन्सर्टमा सुनिल लामासंगै सरोज राइ, सोनम घले अनि फ्रेन्च फरेन लेजनका मनोज राइ तथा उमेश बन्जाराको बेजोड सांगीतिक संयोजनमा दर्शकहरु झुमेको देखिन्थ्यो र लोक दोहोरी घन्किदा मन थाम्न नसकेर जुरुक्क उठेर ननाच्ने कोहि थिएन । कलावती बिश्वकर्मा, सुजन राज भट्ट, गंगा आचार्य, नबिन परियार, गीता शर्मा, बिमला बिश्वकर्मा र घनश्याम पौडेलको दोहोरीले साँझपखको प्रहरलाइ दोहोरी साँझमा रूपान्तरीत गरेको भान हुन्थ्यो। कार्यक्रमको अन्तमा भने इनास फ्रान्सका उपाध्यक्ष आभाष आचार्यको रकिंग प्रस्तुतिले दर्शकहरुलाइ छुट्टै मजा दिलाएको अनुभूति हुन्थ्यो ।
लामो समय देखिको दौडधूप अनि इनास कार्यसमितिका सदस्यहरुको अथक मेहेनत, कार्यक्रमको सहयोगी बिधार्थी संघ फ्रान्स तथा कार्यक्रमलाइ स्पोन्सरसिप गर्न हात अगाडी सारिदिने पेरिस स्थित स्थानीय नेपाली व्यावसायीहरु र अन्य उदार व्यक्तित्वहरुको सदभाव र सहानुभूतिकै कारण पेरिसमा यो बृहत कार्यक्रम हुन् सफल भएको कुरा कार्यक्रम संयोजक सुरेश लामाले जानाकारी दिनुभएको छ । उक्त कार्यक्रमलाइ सफल बनाउन बिद्यार्थी भाइबहिनिहरु निकै खटेका देखिन्थे ।
